Magatukod ang Department of Agriculture – Negros Island Region office sang interagency task force agud matutukan ang pagtapna sang pagduging sang red stripe soft scale insects sa mga katubuhan sa probinsya sang Negros Occidental.
Sa interview kay DA-NIR director Engr. Jose Albert Barrogo, igafinalize nila sa Lunes ang mga miyembro sang isa ka inter-agency task force nga pagapamunuan sang Department of Agriculture – Negros Island Region office.
Ang interagency task force gina-bug-usan sang DA, SRA, DTI, Provincial Quarantine Service, DAR,.DILG, National Crop Protection Center kag mga planters association kaangay sang UNIFED kag CONFED.
Suno kay Barrogo nakigsapol siya upod sa mga opisyal sang Sugar Regulatory Administration nga nagtukod man sang kaugalingon nga task force nga amo magahimo sang solusyon sa problema sang RSSI.
Suno kay Barrogo suporta, ang DA magahatag sang bulig paagi sa pagpagamit sang ila sini nga “dis-infectant vehicle” para sa pagapatigayunon nga pagpang-spray sang insecticide batok sa RSSI.
Suno sa regional director ang anuman nga detalye ukon inpormasyon natuhoy sa halit sang infestation magahalin kay SRA Administrator Pablo Luis Azcona.
Natalana naman magaabot sa Lunes, Hunyo 2 ang pila ka mga opisyal sang DA – Manila nga magapakigsapol upod sa mga taga – SRA bitbit ang mga insecticides.
Mga lugar may narekord nga RSSI infestation amo ang La Castellana, La Carlota City, Bago City, Murcia, Bacolod City, Silay City, EB Magalona, Victorias City, Manapla, Cadiiz City, Toboso kag Sagay City.
