Halos ubos na ang baboy sa banwa sang Pulupandan, Negros Occidental, ang una nga banwa nga nakuhaan sang positibo nga result sang African Swine Fever sa probinsya.
Sa interview sang Bombo Radyo kay Engr. Albert Barrogo, director sang Department of Agriculture Region 6 nagpadala sang samples ang piila ka local government units sang Negros Occidental sa regional office kun sa diin nagpositibo sa ASF ang sample nagikan sa banwa sang Pulupandan.
Ini ang pinakauna nga banwa sa probinsya sang Negros Occidental nga nakakuha sang positibo nga resulta sang ASF gikan sa DA Region 6 kag sa karun halos nagkala-ubos na kalamatay ang mga baboy sa nasambit nga banwa.
Gani nagapanawagan ini sa mga LGUs nga magpasa sang sample agud matest sang temprano agud malikawan nga magdangat pa tubtob magkalaubos kalamatay ang mga baboy kag maglapta ang ASF virus.
Suno kay Barrogo, mahapos icontain ang virus sa ciudad sang Bacolod kag banwa sang Pulupandan bangud nga diutay lang ang baboy gani wala sang kabudlayan sa pagpatigayon sang sentineling ukon pag-monitor kun may yara pa sang ASF virus ukon ano man nga disease sa area.
Nakaligad ginpagwa na nga may yara sang vaccine sa ASF apang suno kay Barrogo ginahulat pa sini ang mando gikan sa Bureau of Animal Industry kun handa na ini nga itublok sa mga baboy.
Samtang, may yara na sang duha ka disinfection vehicle nga mahimo mahulam sang mga LGUs.
