Gin-athag sang Regional Director sang Department of Agriculture Regional Office 6 nga indi mapunggan ang mga manugbaboy kun sa diin magabaligya sang ila nga baboy.
Sa interview sang Bombo Radyo Bacolod kay Director Remelyn Recoter, ginpahayag sini nga ang mga nagasagod sang baboy ang indi mapunggan kun sa diin sila magabaligya sang ila ginsagod nga baboy bangud free enterprise man ang livestock gani hilway ang mga manugbaboy nga magpili sang baligyaan nga makaginansya man sila.
Suno kay Recoter, kun ang problema sang pagmahal sang presyo sang baboy ang kakulang sang supply sini, ginarekomendar sini ang padamuon ang pagsagod sang baboy.
Aminado man ini nga dako ang nangin factor sang epekto sa African Swine Fever kag COVID-19 sa demand sang supply sang baboy.
Ginpahayag man sini nga ang mahimo nga nagkulang ang supply sang baboy sa probinsya bangud mas ginapili sang mga manugbaboy ang magbaligya sang ila ginsagod sa mga traders nagikan sa Manila bangud oportunidad na ini para sa ila nga makaginansya.
Una na nga ginpahayag sang regional director sang DA 6 nga ginpa-augment ni DA secretary William Dar sa supply sang baboy sa Luzon ang green zone ang mga lugar nga hilway sa ASF nga ginlakipan sang Region 6, 7 kag pila ka bahin sang Mindanao.
Nahibaluan nga ang presyo sang karne sang baboy sa Metro Manila sa P400 kag sa syudad sang Bacolod sa Libertad Public Market ang nagahamboy karon sa P260 ang presyo sang kada kilo sang karne sang baboy.
