Liwat nga gin-iligan sang tubig ang patay na nga sapa sa banwa sang La Castellana bangod wala sang maagyan ang tubig kasunod sa pagbubo sang makusog nga ulan.
Sa interview sang Bombo Radyo kay Vice Mayor Rhumyla Nicor “Mhai-mhai” Mangilimutan, ginatinguhaan na sa karun nga mapadasig ang proseso sa pagkuha sang permit nga patigayonan sang dredging ang Tamburong Creek bangod indi naka-ilig ang tubig halin sa bukid bangod sa pagsupon sang volcanic materials halin sang naglupok ang bulkan Kanlaon.
Suno diri, bisan pa nga ipahigad lang ang volcanic materials, mahimo man ini sa gihapon maanod kag masupon sa creek sa tion sang pag-ulan.
Sa karun, nag-eksperyensya sang pagbaha ang banwa ilabi na sa Brgy Biak na Bato matapos nga mag-awas sa sapa ang tubig.
Liwat man nga gin-agyan sang tubig ang creek nga sang 1960’s paglupok sang bulkan Kanlaon natabonan man sang volcanic materials.
Pahayag ni Mangilimutan, bangod indi na kaagi ang tubig sa Tamburong creek, nangita sang alagyan ang tubig kag nag-ilig sa daan na nga sapa.
