Gintindugan sang United Sugar Producers Federation of the Philippines (UNIFED) nga nasolbar na ang problema sa manubo nga millgate price, kag mas dapat nga tutukan ang pagsulod sang sweeteners sa pungsod.
Sa interview sang Bombo Radyo Bacolod kay UNIFED President Manuel Lamata, maayo ang ginpatigayon nga Public Consultation sa Sugar Industry.
Apang nagapati ini nga nasolusyonan na ang problema sa tuman ka nubo nga millgate price paagi sa pagpagwa sang Sugar Order No. 2 ukon ang pag-export sang 100,000 metric tonnes sang raw sugar sa Estados Unidos.
Paathag sini nga sa pagbuhin sang local supply, gilayon man nga nagsaka ang millgate price sa P2,450 gikan sa P2,100 kag ginalauman nga magataas pa.
Suno kay Lamata, ang dapat nga mabantayan amo ang pagsulod sang sweeteners kaangay sang Sucralose kag Aspartame.
Pahayag sini nga ang nasambit nga mga produkto ang 600 beses nga mas matam-is sangsa kalamay.
Ang mga dako nga beverage companies, ang nagbuhin na sa iya sang paggamit sang kalamay, kun sa diin ang sadto 33 grams ang sa karun nanaog na sa 13 grams, bangod ginpasudlan sang sweeteners nga mas barato.
Madumduman nga sadto, ginpasakaan ang taripa sa high-frustose corn syrup sa Duterte Administration, tubtob nga gin-ban bangod dako ang epekto sa industriya sang kalamay.
Pahanumdom sini nga mas malala ang Sucralose kag Aspartame bangod ang mga ini ang ginhimo lamang sa laboratoryo, ukon puro chemicals, indi kaangay sa high-frustose corn syrup nga gikan sa mais.
Mas ginapaanggid sini ang mga sweeteners sa shabu, nga ginapatihan niya nga makahatag sang kahalitan sa lawas.
Sa ila monitoring, nagadangat na sa 700,000 to 800,000 metric tonnes ang napasulod nga sweeteners sa Pilipinas.
Suno kay Lamata, siya ang nagpadala na sang urgent request kay President Ferdinand “Bongbong” Marcos, Department of Agriculture kag Sugar Regulatory Administration, nga mahimuan sang tikang kag mapunggan ang pagsulod sang mga sweeteners sa pungsod.
