Igabalik na sa dalan Lacson ang main festival site sa pagpatigayon sang Bacolaodiat Festival 2024 nga patigayunon sa February 9 tubtob sa February 11, 2024.
Ang Festival site sa Lacson ang magaumpisa sa 6th Street tubtob sa 13th Lacson Street ukon tubtob sa L Fisher Hotel.
Ipahamtang ang tatlo ka stage sa dalan Lacson kalakip na ang main stage sa North Capitol Road.
Sa karun, ginanegosyar pa sang organizer ang The Upper East sang Megaworld para sa dugang nga festival site.
Wala naman sang aktibidad nga patigayunon sa Bacolod City Government Center.
Suno kay Bacolaodiat Festival chairman John Stephen Sy, ginapaabot sa Pebrero 10, 2024 magakadto sa Bacolod si Lucio Co nga ideklarar nga adopted son kag mangin honorary mayor sang Bacolod.
Nagpasiguro ang organizer nga ang ini nga nga edisyon sang Bacolaodiat Festival ang mas madako ilabi na nga ang 2024 ang Year of the Wood Dragon ukon ‘most powerful’ animal sa zodiac signs.
May anum ka grupo ang magapaindis-indis sa Lantern and Street Dance competition.
Ginalantaw nga madamo naman sang mga turista ang magapadulong sa ciudad agud saksihana ang mga aktibidad sa Bacolaodiat Festival Nahibaluan nga ang Bacolaodiat Festival ang na institutionalize base sa City Ordinance No. 426 nga napasar sang Enero 2007.
