Amat-amat na nga ginakay-o ang dalan sa Purok Balabag, Barangay Granada, Bacolod City nga ginareklamo sang mga residente nga madugay na nga ginpabay-an kag wala gintapos kay-o.
Gindangop sa Ipa-Bombo Ta! segment sang Bombo Radyo Bacolod ang reklamo kag sa pagtsekyar sang Bombo News Team may bahin sang dalan nga taklaron kag gubaon samtang may bahin man nga nasemento ang tunga sang dalan apang wala man natapos.
Sa interview kay Henry Malunes, Barangay Agrarian Reform Council Chairman, wala ini nakahibalo kun ano ang kontrata sa pagkay-o sa dalan apang ginkalipay nila nga masemento ang alagyan agud mahapos sa ila ang pagbyahe sang mga utanon kag indi na mabudlay nga makalabay kun sa tion sang emerhensya.
Suno diri, nadelay lamang ang construction apang sa karun ginakalipay sini nga gin amat-amat na kay-o ang dalan. Samtang, dako ang pagpasalamat sang Punong barangay sang Barangay Granada, Bacolod City nga ginpadayon na ang pagkay-o sa dalan sa bahin sang purok Balabag.
Sa interview sang Bombo Radyo kay Punong Barangay Armando Vito, indi man madasig ang pagtrabaho apang nagakit-an na sini nga may yara sang progress.
Nagpasalamat ini sa Department of Agriculture kag contractor nga madasig nagsabat sa panawagan nga balikan ang pagkay-o sa dalan.
May yara sang ginpresentar nga rason kun ngaa nadelay ang trabaho apang matapos ang pag-estruyahanay, pagkasunod nga adlaw ginpadayon ang construction.
Nagpasalig si Vito sa mga residente sang barangay nga wala sini ginapabay-an ang proyekto kag aktibidades sa barangay para sa kaayohan.
