Pagabutangan sang alkalde sa banwa sang Valladolid sang dugang nga poste sang suga, signage kag mas malaba nga reflectorized signage ang kurbada nga dalan sa Sagua Banua, Valladolid, Negros Occidental.
Ini ang kasunod sa asud-asud nga mga aksidente nga nagluntad sa nasambit nga lugar nga ginalakipan sang nagkalayo nga duha ka wing van nga nag-utas sang apat ka kabuhi.
Suno kay Valladolid Mayor Enrique “Bebot” Miravalles, magabutang ini sang mga dugang nga pagpaandam sa lugar apang wala ini nagapati nga accident prone area ang nasambit nga dalan.
Pahayag sang alkalde nga masanag ang lugar kag makita gid ang signage nga nagapahibalo nga likuan ang dalan.
Dugang pa sini nga masami mga naka-inom ang mga nagaka-aksidente sa dalan.
Suno kay Miravalles, natukiban nga hubog ang driver sang truck nga nagakarga sang tubo nga natumba sa amo nga dalan sang tinalikdan.
Samtang nakabatun man ini sang impormasyon nga ang wing van nga pabalik na sa Bacolod ang naga-ekis na ngadaan ang pagpadalagan gikan palang sa banwa sang San Enrique gani nmay posibilidad man nga hubog ang driver.
Liwat sini nga pahanumdom sa mga driver sang mga salakyan nga kun matapos na sa trabaho kag magpauli, likawan nalang ang pag-inom.
