Natigayon na nga maclear ang dalan sa Sitio Tamburong, Barangay Biak-na-bato sa banwa sang La Castellana nga napuno sang volcanic materials kaina sang aga.
Sa interview sang Bombo Radyo Bacolod kay La Castellana Public Information Officer Remuel Lajo, ang nag-awas nga volcanic debris sa dalanon ang mas madamol kun ipaanggid sa nakaligad nga Agosto 31.
Pahayag sini nga kaangay man gihapon ang mga dalan nga ginlabayan sang volcanic debris.
May 68 ka pamilya ukon 249 ka indibidwal naman nga gin-evacuate sa Barangay Evacuation Center.
Samtang may isa ka balay nga yara sa pangpang nga totally damaged kag may kapin 10 nga partially damaged, kaangay sang mga nagkalaluk-an ang dingding ukon ginsulod ang balay sang volcanic materials.
Madumduman nga alas-2:00 kaina sang kaagahon sang mag-awas ang tubig sa Ibid Creek bangod sa tayuyon nga ulan halin pa kagab-i.
Kagab-i pa lamang may mga ginpatigayon na mga preemptive evacuation, samtang ang mga nabilin ang iga-evacuate man kuntani sang aga, apang sila ang wala na sang malabayan bangod sa tuman ka damol nga volcanic debris.
Ginkinahanglan naman nga maggamit sang payloader agud mahawanan ang dalan.
