Manageable sa gihapon ang sitwasyon sa una nga adlaw sang pagbukas sang klase apisar nga traffic ang dalanon.
Suno kay Bacolod Traffic Authority Office (BTAO) Head Police Major Junji Liba, wala sang may nareport nga untoward incidents sa lakat ang trapiko sang Lunes apang may gamay nga problema humalin alas 6:30 sang aga tubtob alas 7:00 sang aga sa Araneta Street, partikular na sa entrance sang Negros Occidental High School bangud sa kadamuon sang mga salakyan.
Suno sa iya, gagiho sa gihapon ang mga salakyan apang mahinay ang ila lakat bangud sa kadamuon sang vehicle sa dalan.
Duha ka semana antes paman nagbukas ang klase, suno kay Liba, may mga ginpangplastar na sila nga mga BTAO personnel sa mga dalanon nga malapit sa mga buluthuan sa Bacolod.
Sa kada eskwelahan sa ciudad, duha ka mga personnel ang ila gindeploy samtang pito naman sa Education and Training School (ETCS) kag apat sa Negros Occidental High School (NOHS).
Nakabaton man sila sang mga reklamo ilabi na nga nagalain pa ang tiyempo apang ila man ini gin-address sang maayo.
Ginlauman na sang BTAO ang pagdamo sang mga salakyan bangud amu ini masami ang nagakatabo sa pagbukas sang klase.
Nagapanugyan si Liba sa mga drivers ilabi na sa mga jeep nga indi magpundo agud magpapanog ukon magpasakay sang pasahero sa mga unloading zone kag magsunod sa mga patakaran agud indi makahalit sa iban nga motorista.
