Patay ang duha ka gina-alegar remnants sang nadismantle na nga Central Negros One sang New People’s Army (NPA) sa engkwentro batok sa militar sa Barangay Sag-Ang, La Castellana, Negros Occidental kaina alas-6:45 sang aga.
Sa interview sang Bombo Radyo Bacolod kay 303rd Infantry Brigade commander Brig. Gen. Orlando Edralin, ginabanta lima ka mga NPA members ang nakasumpong sang 62nd Infantry Battalion, nga ginreport nga nagapatigayon sang recruitment kag extortion activities sa nasambitan nga lugar.
Naglawig sang kapin tatlo minutos ang pagbayluhanay sang lupok nga nagresulta sang pagkamatay sang duha ka mga rebelde samtang napuhag naman sa nagkalainlain nga dereksyon ang iban pa.
Wala naman sang casualties sa bahin sang mga militar.
Suno kay Edralin, padayun pa ang pursuit operation sang mga militar sa mga nakapalagyo nga rebelde.
Sa karun wala pa natumod ang identity sang mga napatay nga NPA members, kag ini ang kilalahon pa pinaagi sa bulig sang mga former rebels nga nagbalik na sa sabak sang gobyerno.
Wala naman sang ginpatigayon nga evacuation sa mga residente, samtang ang militar ang nagapakig-angot naman sa local government unit kasubong man sa La Castellana Disaster Risk Reduction and Management Office kag Municipal Police Station para sa pagpanaog sang mga bangkay.
Pasalig ni Edralin nga hatagan nila sang nagakaigo nga pagtahod ang mga napatay nga rebelde bangod aminado ang mga ini nga biktima lamang ang mga ini sa sala nga ideolohiya.
