Wala naman ginalauman sang first time participant nga Danzakin sa Handog ng Bombo Radyo and Star FM sa Masskara Festival – Dance Showdown Competition kagab-i nga sila ang magadaog nga 1st Runner Up.
Sa kompetisyon nga ginpatigayon sa Bacolod Public Plaza, aminado si Hiro Grey Guanzon, member sang Danzakin, nga sang ang ila nga team kag ang United Freestylerz na lamang ang nabilin nga team sa announcement of winners naglaom sila nga Danzakin ang ideklarar nga champion bangod makatatlo na nga anay nangin champion ang ila kasumpong.
Apang nakita man sini nga deserving ang United Freestylerz sa ika-apat nga championship title.
Suno kay Guanzon, dako na nga kalipay para sa ila nga mangin 1st runner up ilabi na nga sang nakaligad nga Handog ng Bombo Radyo and Star FM sa Masskara Festival – Dance Showdown Competition sila ang tubtob lamang sa audition kag wala nakasulod.
Dugang pa niya nga duha ka semana man nga todo ang ila preparasyon antes ang kompetisyon.
Ginakabig naman sini nga birthday gift ang kadalag-an bangod kaadlawan sini sang Lunes.
Bangod tanan sila sa grupo ang estudyante, pagatungaon na lamang sang Danzakin ang P8,000 nga cash prize agud makadugang sa ila nga balon.
Pasalig ni Guanzon nga sila ang magapasakop pa sa Handog ng Bombo Radyo and Star FM sa Masskara Festival – Dance Showdown Competition sa masunod nga tuig sa paglaom nga makuha ang kampeonato.
Ginpasalamatan man sang mga ini ang Bombo Radyo kag Star FM nga sila ang ginhatagan sang platform agud mapasundayag ang ila talento.
