Sa ika-apat nga beses, liwat nga nagkampeon ang United Freestylerz sa ginpatigayon nga Handog ng Bombo Radyo and Star FM sa Masskara Festival – Dance Showdown Competition sa Bacolod City Public Plaza kagab-i.
Nangin 1st runner up naman ang Danzakin kag 2nd runner up ang Gen Alpha.
Ang United Freestylerz nga nakakuha sang 96 percent gikan sa judges ang nagdaog sang P10,000 nga cash prize, ang Danzakin naman nga nakakuha sang 92 percent ang nagpauli sang P8,000 samtang ang Gen Alpha nga nakakuha sang 91.66 percent ang nagpauli sang P5,000.
Wala naman sang napierde sa kompetisyon bangod Ang Obsequious Negros, V Fresh, Untitled Dazzle Crew ukon UDC, New Team, UGR Dancers, Pentagon kag JRE Dance Company ang nagbatun sang tag-P2,000 bilang consolation prizes.
Suno kay Elmer Lardo, member sang United Freestylerz, ginapasalamatan gid nila ang Ginoo bangod sa kadalag-an.
Pahayag sini nga madamo sang ila nangin kabudlayan antes nakabuhat sang maayo nga performance ilabi na nga tanan sila ang nagatrabaho.
Bangod sini, mabudlay ang magpangita sang oras nga libre agud sila tanan ang makapractice.
Ginapasalamat sang mga ini nga sa ila pagtinguha, ila nakuha ang ika-apat nga grandslam championship sa Handog ng Bombo Radyo and Star FM sa Masskara Festival – Dance Showdown Competition.
Suno kay Lardo, ginahalad nila ang ila performance sa ila kaupod sa grupo nga ginbawi na sa kalibutan.
Ang P10,000 nga nabatun ang ila naman nga gamiton sa outing kag bonding sang ila nga dance group.
Ginalantaw man sang mga ini nga liwat magpasakop sa masunod nga kompetisyon.
