Masobra P1 million nga balor sang illegal nga druga ang nakumpiskar nagikan sa dance instructor nga subject sang buybust operation sang Bacolod Police Station 5 sa Purok Gonzaga, Barangay Taculing, Bacolod City kagab-i.
Sa interview sang Bombo Radyo kay Police Captain John Christopher Masangkay, station commander sang Bacolod Police Station 5, ginkilala ang suspetsado kay Arjun Ramos, 27 anyos, may asawa kag anum ka tuig nga bata.
Suno kay Masangkay, newly identified kag bag-o lang nadakpan ang suspetsado.
Mismo sa ila puluy-an ini ginbaklan sang illegal nga druga kag ginpatigayun ang buybust operation.
Suno sa station commander, may grupo si Ramos kag bodegero sila sang shabu.
Suno diri, ini ang follow up operation sa una na nga buybust operation nga ila ginpatigayon sang Agosto 5 kun sa diin masobra P700,000 nga balor sang illegal nga druga ang nakumpiskar.
Nakuha sa sulod sang kwarto ni Ramos ang 151 grams sang suspected shabu nga may estimated market value nga P1,030,000.
Sa karun nakahunong ang suspetsado sa Bacolod Police Station 5 kag natalana nga pasakaan sang kaso nga paglapas sa R.A. 9165 ukon Comprehensive Dangerous Drugs Act of 2002.
Samtang, ginpahayag man sang amay sang arestado nga nagasa-ot ang bata sini sang gindakop sang mga otoridad sang ginpatigayon ang buybust operation.
Suno kay Arturo Ramos, indi iya sang anak sini ang nakompiskar nga iligal nga druga.
Wala man suno sa iya nagagwa sa ila balay ang iya bata apang kun matuod man ini, gintugyan na sang amay kay Arjun ang pagdepensa sa iya kaugalingon.
