Gintawag ni Cadiz City Mayor Salvador “Bading” Escalante nga “uyaya” ang Department of Agrarian Reform bangod sa wala gihapon maresolbar nga issue sang duta sa Hacienda Escolastica, Brgy. Mabini, Cadiz City.
Madumduman nga pito ka mga Agrarian Reform Beneficiaries (ARBs) ang napilasan matapos gintiro, sa komosyon batok sa mga blue guards ni Ernesto Lim Luzuriaga sang Setyembre 30.
Sa interview sang Bombo Radyo Bacolod kay Escalante, masobra dekada na ang issue sa duta apang wala gid gihapon naresolbar sang ahensya.
Suno diri, bisan sa iya wala na sang pagsalig ang mga tawo bangod makapila na ini nagpasalig nga mahatag na ang duta, apang kaangay nga isa lamang ka pamalabag sang tag-iya ang DAR ang nagasurrender na.
Indi mahangpan sang alkalde kun ano ang panindugan sang tag-iya sa pagbawi sang ginhatag sini nga duta bangod lamang may-ara sang technical problems.
Suno kay Escalante, si Lim-Luzuriaga ang may ginnegosyar nga duta sa DAR sa Cadiz, Escalante, Sagay kag Iloilo nga nagadangat sa 250 hectares.
Apang sa ulihi, ang luyag lamang buy-an sang tag-iya amo ang iban nga duta samtang indi na sini pag-ihatag ang sa Cadiz.
Suno diri, kuntani kun magahatag sang duta ini ang tuod-tuoron, samtang kun indi naman luyag indi man dapat pasaligon ang buot sang mga makaluluoy nga mangunguma.
Pahayag sini nga pagfollow-up lamang ang mahimo sini bilang alkalde.
Suno diri, wala ginapabay-an sang ciudad ang Hacienda Escolastica, kag pamatuod sini ang sementado na nga dalanon kag gintukod nga Elementary School sa lugar.
Gani ang nagapagarot nagid lamang sa kabuhi sang pumuluyo amo ang madugay nga pagproseso sang DAR sang paghatag sang nagakadapat nga duta.
Ginalantaw sini nga ang pagdanak sang dugo, ang makapadasig sa ahsensya sa paghulag.
