Arestado si Daraga, Albay Mayor Carlywyn Baldo, matapos ginserbe ang warrant of arrest may kaangtanan sa pagpatay kay Ako Bicol Representative Rodel Batocabe kag sa iya police aide sadtong 2018.
Ang arrest warrant ang ginserbe sang Philippine National Police – Criminal Investigation and Detection Group (CIDG) kapin alas-12:45 kaina sang kaagahon sa Camalig, Albay.
Si Baldo ang gingiyahan naman sang iya nga legal counsel samtang ini ang gindala sa CIDG Albay office para sa documentation kag proper disposition.
Nahibaluan nga nagpagwa sang bag-o nga arrest warrant ang Regional Trial Court – National Capital Region batok kay Baldo, nga kalakip sa lima nga mga akusado sa 2 counts of murder nga wala sang ginarekomendar nga bail.
Madumduman nga sang Disyembre 2018, sanday Batocabe kag ang iya police aide nga si Police Master Sergeant Orlando Diaz ang ginluthang-patay samtang nagatambong sa isa ka gift-giving event sa Daraga.
Hugot naman nga ginapanginwala ni Baldo ang kaangtanan sa krimen.
Apisar nga ginserbe sadto ang nauna nga arrest warrant, si Baldo ang nahatagan sang temporaryo nga kahilwatan matapos makapyansa sang Setyembre 2019.
