Opisyal na nga nag-atubang bilang testigo sang depensa si Davao City Assessor Engr. Jaime Adalin sa pagbalik sang impeachment trial ni Vice President Sara Duterte subong nga Nobyembre 9.
Siya ang ginpresentar ni Defense Counsel Atty. Lindon Miguel Bacquel agud pamatud-an nga ang mga propedad nga sakop sang Transfer Certificate of Title (TCT) ang nadeklarar ni VP Sara sang maayo sa iya nga Statement of Assets, Liabilities, and Net Worth (SALN).
Apang, gilayon nga ginkwestyon ni Prosecution Counsel Atty. Benjamin Tolosa Jr. ang tinutuyo sang depensa kag gintindugan nga indi mapamatud-an sang testigo nga ang propedad sa SALN ang parehas sang yara sa TCT bangod sa nakita nga “glaring discrepancy” partikular na sa acquisition value sini, luwas pa sa objection sa pila ka offer of testimony nga suno diri “improper” kag “misleading.”
Sa tunga sang trial, ginhingyo ni Atty Bacquel ang temporary suspension sang trial agud matsekyar ang dugang nga dokumento nga dala sang testigo.
Nag-apelar si Bacquel kay Presiding Officer Francis “Chiz” Escudero nga sila ang mahatagan sang pila ka minutos agud ma-examine ang mga dokumento, matapos sini ginpamangkot kun may kopya sang tax declaration ang depensa.
Naghatag man gilayon si Escudero sang tatlo ka minutos nga recess.
Antes paman ang interruption, ginkumpirmar ni Adalin paagi sa dala sini nga Administrative District Index Map nga ang Brgy Matina Crossing kag Brgy 74-A ang isa lamang ka lugar sa Davao City.
Kasunod sini, nagsugod naman ang prosekusyon nga magstipulate sa nasambit nga issue.
