Nagpanawagan si Davao City Mayor Sara Duterte kay Presidente Rodrigo Duterte nga magpatawag sang isa ka special session sa Kongreso agud maaddress ang nagasaka nga presyo sang produktong petrolyo kag sang impact sini sa mga presyo sang commodities.
Suno sa vice presidential bet, siya kag si former Senator Ferdinand Bongbong Marcos Jr. ang nagapanawagan sa suspension snag excise tax sa fuel agud mapahagan-hagan ang kabug-atan sa mga operators kag drivers sang public transport.
Suno kay Sara, nagapanawagan ini indi bilang anak sa iya amay kundi bilang isa ka pumuluyo sang Pilipinas.
Gindugang man sini nga dapat man nga tun-an liwat ang oil price stabilization nga dapat ginapondohan sang gobyerno.
Suno kay Duterte, dapat nga buligan sang Kongreso ang Executive department sa pagdeterminar sang mga hagna nga dapat i-enforce agud makabulig sa mga Filipino sa ginapangatubang sa karun nga krisis.
Pila ka mga mamalidha ang nagduso na sang suspension sang excise tax sa fuel products.
Sa bahin naman sang Malacanang, ginhangkat sini ang Kongreso nga ireview ang Oil Deregulation Law, partikular na ang provisions sa presyo kag inclusion sang minimum inventory requirements sa layi.
