Ginpahayag sang Davao police nga preparado ang ahensya nga mag-atubang sa isa ka Senate inquiry sa Davao City sa Biyernes, nga maga-imbestigar sa tuyo nga pagdakop sa pugante nga pastor nga si Apollo Quiboloy sa compound sang Kingdom of Jesus Christ.
Ang Senate Committee on Justice and Human Rights ang magapatigayon sang isa ka ocular inspection sa 30 ka hektarya nga compound kag isa ka public hearing matapos nga ginclaim sang KOJC members nga naapektuhan sang police operations ang ila academic rights kag religious freedom.
Pila ka mga KOJC members kag police authorities ang napilasan sa nasambit nga mga operasyon nga magapadulong na sa ikaduha nga semana.
Suno kay Atty. Israelito Torreon, ang chief legal counsel sang KOJC, personal ini nga nagrequest sang intervention sang Senado natuhoy sa nasambit nga butang.
Suno sa iya, kinahanglan sini nga mangin transparent bangud sa pila ka mga hitabo, violations sang kinamatarong sa kabuhi, kahilwayan kag propedad sang iya kliyente.
Suno kay Davao Region police chief BGen. Nicolas Torre III, ila ginawelcome ang nasambit nga imbestigasyon kag willing ang mga ini nga ipakigbahin ang mga discoveries kag impormasyon nga ila nakuha sa nasambit nga mga operasyon.
