Nakabaton ang Day Care Center sang Purok Villagracia, Barangay Bata, Bacolod City sang airconditioner kag television gikan sa alkalde sang ciudad matapos nga ini ang nagpadulong didto agud nga lantawon ang sitwasyon kasunod sang ginpadangat sa Isugid kay Mayor nga problema sa yab-ok gikan sa ginadevelop nga bahin sang lugar.
Sang Domingo, ginpadulungan ni Bacolod City Mayor Alfredo “Albee” Benitez ang Purok Villagracia, Barangay Bata kaupod si Bacolod City Councilor Kalaw Puentevella.
Isa sa ginkadtuan sini ang Day Care Center kag ginpamangkot ang in-charge kun ano ang kinahanglan, kag nagsabat man ini nga electric fan apang magluwas sini naghatag pa ang alkalde sang aircon kag TV.
Madumduman nga ginpadulungan sang Bombo News Team ang lugar matapos nga nagpadulong si Reggie Malagsic sa estasyon agud nga ipadangat ang reklamo angot sa yab-ok.
Nakuhaan man sang news team sang video kag litrato ang nagatap-ok nga yab-ok gikan sa construction site sang Home World Constructions sa nasambit nga lugar.
Madamo man sang naapektuhan sang pagtap-ok sang yab-ok bangud pila ka mga kabataan kag isa na diri ang anak ni Malagsic ang gindala sa ospital bangud nagsululuka.
Matapos nga mapadangat sa ciudad, nagpamutang na ang construction company sang trapal kag natalana nga isaylo ang alagyan sang trucking padulong sa construction site.
Sa pressconference, ginpahayag ni Bacolod City Mayor Alfredo “Albee” Benitez nga dapat mag-aligmat ang barangay officials nga magbutang sang tubig para ibasya sa lugar kag sa ginaagyan sang truck agud indi na magtap-ok ang yab-ok bangud indi ini maayo para sa mga residente.
