Ginpaisol ang deadline sa pagpa-register sa Bacolod City Covid-19 Contact Tracing (BaC-Trac) system bangud nga ginahanda pa ang Implementing Rules and Regulations (IRR) sini kag sa system error nga nagakatabo.
Nahibaluan nga ang “COVID-19 Contact Tracing System Ordinance of Bacolod City, ang gin-author ni Councilor Lady Gles Pallen, presidente sang Liga ng mga Barangay, ang naga-cover sa tanan nga mga business establishments, government offices, residente kag mga bisita nga yara sa territorial jurisdiction sang Bacolod City lakip na ang mga public utilities kag spaces kaangay sang public markets, public terminals kag public transport.
Una na ini nga natalana nga ipatuman sumugod Oktubre 12.
Apang sa interview sang Bombo Radyo Bacolod kay Pallen, ginpahayag sini nga bangud sa kabudlayan sang iban nga mga pumuluyo nga makasulod sa BaCTrac system, ila ginpakamaayo nga iisol ang pagpatuman sini.
Dugang pa sang opisyal nga may natalana nga one-on-one session ang mga barangay sa Management Information Technology and Computer Services (MITCS) agud nga mabuligan sila sa ila nga concern angot sa BaCTrac system.
Suno pa kay Pallen nga mas kaayuhon pa gid nila ang ila nga information drive agud nga maka-register na sa mas madali nga pahanon ang mga residente.
Gin-athag man sini nga wala sang penalidad ang mga residente nga indi maka-register sa BaC-Trac bangud nga pwede man ang mga ini gihapon maka-manual log-in sa mga establisyemento.
Apang, sa idalom sang ordinansa, may nagahulat naman nga penalidad nga P1,000, P2,500 kag P5,000 kag pagka-priso nga indi magnubo sa anom ka bulan para sa first, second, third kag succeeding offenses sa mga private establishments kag government offices nga indi maka-comply.
