Ginpahayag sang dean sa College of Law sang University of St. La Salle (USLS) nga sila ang nagagiya lamang kag ang pagpakapasar sa Bar Examinations ang bangod sa personal nga effort sang mga estudyante.
Ini matapos nga nangin Rank-19 si Atty. June Steve Barredo, sang banwa sang Cauayan, kag graduate sang USLS Bacolod sa bag-o lamang nagwa nga resulta sang 2024 Bar Examination nga gin-anunsyar sang Korte Suprema kahapon.
Si Barredo ang nakakuha sang average ratings nga 82.80 percent.
Sa interview sang Bombo Radyo Bacolod kay Atty Ralph Sarmiento, indi ini segurado kun pila ang passing rate sang USLS Bacolod bangod mahimo may iban nga estudyante nga wala nakacoordinar sa ila.
Apang 21 gikan sa 40 ka first takers ang nakapasar ukon 52 percent.
Ini ang mas mataas kun ipaanggid sa 30 percent average national passing rate.
Aminado si Sarmiento nga may panagupnop na ini nga makasulod sa Top si Barredo gani antes paman nagpreparar na ini sang poster nga gamiton sa pagpost sa social media.
Suno diri, first year pa lamang makita na ang potensyal kay Sarmiento gani wala na sila nakibot nga ini ang nakasulod sa Top 20.
Dugang pa nga ini ang class valedictorian man sang maggraduate.
Paathag ni Sarmiento nga requirement nila nga makapasar lamang kun mahimo makasabat batok sa iya, gani first year pa lamang makita na kun sin-o ang may potensyal.
Sa naka-andan, Top 10 lamang ang gina-anunsyar apang bangod masobra 10,000 ang bar takers subong nga tuig, Top 20 ang ginlawag sang Korte Suprema.
Suno diri, sila ang nalipay nga kabahin sa journey sang mga Bar passer apang ang accomplishment ang bunga mismo sang disiplina, panindugan kag commirment sang mga estudyante.
Pasalig sini nga ang USLS ang magasuporta sa mga Bar takers tubtob nga sila ang mangin full pledged member na sang Philippine Bar Association.
Pangabay sini nga ikabuhi sang mga Bar passer ang motto sang USLS School of Law nga “live as a good christian lawyer”.
