“Maximum penalty ukon death penalty,” Ini ang ginapangayo sang pamilya Dignadice nga penalidad batok sa suspek.
Madumduman nga si Kristine Joy ang ginreport nga nadula sang Oktubre 29 kag sa pareho nga adlaw nasapwan ang salakyan sini sa Sitio So-ol, Brgy. Gargato, Hinigaran, Negros Occidental.
Sang Nobyembre1 nasapwan ang bangkay ni Dignadice sa katubuhan sa Central Ma-ao, Brgy Don Jorge Araneta, Bago City kag ini ang yara na sa advance stage of decomposition.
Mismo si Police Staff Sgt. Enrique Gonzalodo ang nag ako nga siya ang nagpatay sa biktima.
Ginpahayag man ni Gonzalodo nga kahagugma sini si Dignadice.
Sa karun naka-detain ang suspek sa detention facility ng Criminal Investigation and Detection Group (CIDG) sa Negros Occidental Police Provincial Office.
Suno kay Mary Grace Dignadice, utod ni Kristine Joy Dignadice, dapat pinahan sang maximum penalty kag death penalty kung may ara kag ini ang ginahingyo sang bug-os nga pamilya.
Ang pamilya Dignadice ang gin-updan kahapon ni Negros Occidental 3rd District Representative Javi Benitez nga mag-file sang administrative complaint sa National Police Commission batok sa suspek.
Ginpasalamatan sang pamilya ang tanan nga bulig nga ginhatag sang kongresista sa ila nga pamilya kag indi nila ini makalimtan miyentras tanto.
Nagapanawagan man ini nga padasigon ang imbestigasyon agud nga madasig man nga mahatagan sang hustisya ang kamatayon sang ila nga utod.
