Nagsaka na sa 3,645 ang death toll bangud sa makamamatay nga linog sa Myanmar kun sa diin 5,017 ka mga persona ang pilason samtang 148 ang nagapabilin nga missing.
Suno sa Department of Meteorology and Hydrology sang pungsod, 98 ka mga aftershocks ang nag-igo sa Myanmar humalin sang nagtay-og ang linog sang Marso 28, nga naga-range humalin sa 2.8 tubtob 7.5.
Masobra 80 porsyento sang buildings ang nagkalaguba ilabi na ang dalagko nga mga townships sa Sagaing, Mandalay kag Magway.
Ginreport sang UN humanitarian affairs coordination office (OCHA) nga masobra 500,000 ka mga persona sa palibot sang pungsod nga nabilin nga wala sang access sa life-saving health care.
Samtang, ang India, European Union, Estados Unidos, UN kag pila ka international organizations ang padayon nga nagapadala sang ayuda kag rescue teams para sa mga biktima sang linog sa Myanmar.
