Ginpahayag sang Pinuno sa Provincial Management Program Division (PDMPD) sang Negros Occidental nga nagdangat na sa 45 ang narecord nila nga casualty tuga sang bagyo Odette sa bilog nga probinsya.
Suno kay Dr. Zeaphard Gerhart Caelian, padayun pa nga ginaverify ang iban nga mga kaso agud matumod kun ano ang rasun sang ila pagkamatay.
Sa karun suno kay Caelian ang confirmed nga report sang casualty sa Philippine National Police (PNP) ang yara palang sa 27.
Nagahulat pa sang dugang nga spot report ang Negros Occidental Provincial Disaster Risk Reduction and Management Office (PDRRMO) gikan sa PNP agud nga makompleto ang dako nga discrepancy sa records.
Ang record sang PDRRMO ang derekta naman nga nagikan sa mga local government unit (LGU) pinaagi sa ila tagsa tagsa ka DRRM Offices.
Paathag ni Caelian nga ginavalidate pa sa karun kun ang mga narecord ang napatay gid man maykaangtanan sa bagyo Odette.
Pahayag sang PDMPD Head nga kalabanan sa mga biktima sang kalamidad ang mga nalumos ilabi na ang mga nagkalaanod ang mga panimalay sa tubig-baha.
Suno kay Caelian, ini ang tuga sang indi pagpati sang iban nga mga pumuluyo bisan pa nga ginapanugyanan na nga mag-evacuate bangod sa posibilidad sang pagbaha.
Aminado ini nga ang iban ang nagapawala lang bangod madugay na nga wala nakabaha sa ila lugar, apang pahanumdom ni Caelian nga dapat magpamati gid sa mga abiso ilabi na sa kaangay nga bagyo nga nagadangat sa signal no. 4.
Suno kay Caelian, wala man sila nagkulang kasubong man ang media sa pagpahanumdom kasubong man ang panugyan nga magsunod kun may ginapatigayon nga preemptive evacuation.
May iban naman nga mga Negrosanon nga napatay bangod nadagdagan sang mga sanga sang kahoy ukon mismo natumbahan sini. Santo sa record sang PDRRMO, ang apektado nga mga pamalay sa Negros Occidental ang ginalakipan sang 56,674 nga totally damaged kag 200,157 nga partially damaged.
