Lunsay nagpalabtikanay sang istorya ang duha ka mga kandidato sa pagka-bise alkalde sang ciudad sang Bacolod kadungan sang ila nga pag-atubangay sa Debate sa Bombo.
Nagdugay sang masobra isa ka oras kag tunga ang pagdebate nanday incumbent Bacolod City Vice Mayor El Cid Familiaran kag former vice mayor Jude Thaddeus Sayson sa studio mismo sang Bombo Radyo kun sa diin nagbantay man sa idalom sang estasyon ang ila tagsa ka mga supporters agud magpakita sang suporta.
Ginplastar nanday Familiaran kag Sayson ang ila plano sa tion nga sila ang mapilian bilang presiding officer sang Sangguniang Panlungsod sa Mayo 13 nga eleksyon.
Ginsabat man sang mga ini ang isyu tuhoy sa nagtulog na nga mga ordinansa sang ciudad kag pasiguro nga indi sila mangin tuta ukon stamping pad sang office of the city mayor.
Kaangay sang kinaandan, ginhatagan man sang tsansa ang mga kandidato nga maghaboy sang pamangkot sa kasumpong kag nagbaton man sang pamangkot nagikan sa mga supporters.
Nagpirma man sanday Familiaran kag Sayson sang peace covenant.
Ang Debate sa Bombo ang gintambungan ni Diego Malacad, secretary-general sang United Negros Drivers and Operators Center kag acting Bacolod City election officer Janette Lamban.
Suno kay Lamban, maayo ang debate sa Bombo bangud makadesisyon ang mga pumuluyo kun sin-o ang nagakabagay sa pwesto.
Aminado ini nga lunsay maayo sanday Familiaran kag Sayson apang isa lang ang pilion sang mga pumuluyo.
Samtang,aminado naman ang duha ka mga kandidato sa pagka-bise alkalde sa ciudad sang Bacolod nga may mga ordinansa ang ciudad nga wala naimplementar sang husto.
Ginpahayag ni former vice mayor Jude Thaddeus Sayson nga prayoridad niya ang pagreview sa mga ordinansa nga nagtulog sa tion nga siya ang mapilian nga bise alkalde.
Suno diri, dapat nga may yara sang tracker nga magalantaw kun ano na ang nadangatan sang implementasyon sang ordinansa.
Nagapati ang bise alkalde nga madamo sang mga ordinansa nga napabay-an kag kun may yara man, hapaw lamang.
Suno naman kay incumbent Bacolod City Vice Mayor El Cid Familiaran, husto ang obserbasyon ni Sayson nga may mga ordinansa gid man nga napabay-an apang ginbanggi sini ang pahayag sang anay bise alkalde nga wala sang tracker sa mga city ordinances.
Suno kay Familiaran, may tracker ang tanan nga mga ordinansa. Sa pihak sini, iya man ginpamilit nga may mga ordinansa nga natutukan kaangay sang solidwaste management kun sa diin ginapain ang madunuton sa indi madunuton.
Date of airing: April 9,2019
