Ginpahayag sang gobernador sa probinsya sang Negros Occidental nga nagsapol sila kaupod ang mga alkalde sa mga lugar sa palibot sang Bulkan Kanlaon, kahapon sang hapon kag isa sa naestoryahan ang decampment.
Nakighinun-anon ang gobernador kanday La Castellana Mayor Rhummyla Nicor-Mangilimutan, La Carlota City Mayor Rex Jalandoon kag Bago City Mayor Nicholas Yulo sa opisina sini sa provincial capitol.
Suno kay Negros Occidental Governor Eugenio Jose “Bong” Lacson, nakasugtan sa ila meeting nga may mga evacuees nagikan sa banwa sang La Castellana kag ciudad sang Bago ang makapauli na sa tagsa nila ka balay.
Ini ang mga evacuees nga yara sa gwa sang 6 km radius extended danger zone sang bulkan nga gin-evacuate bangud sa abo sang Bulkan Kanlaon sang naglupok ini.
Samtang ang mga evacuees naman nga yara sa ciudad sang La Carlota ang magapabilin nga status quo.
Wala pa mahibaluan kun pila ka mga evacuees ang makapauli na sa tagsa nila ka mga puluy-an bangud wala pa sang data nagikan sa mga Local Government Units.
