Indi mapaktan sang pinuno sang Bacolod City Disaster Risk Reduction and Management Office kun pila ka adlaw antes matapos ang declogging operations sa mga merkado sa ciudad sang Bacolod.
Sa interview sang Bombo Radyo kay Executive Assistant to the Mayor Jomarie Vargas, subong nga hapon nagsugod ang declogging sa Libertad Public Market bangud nagpabakuna kahapon ang mga miyembro sang declogging team.
Unahon sang team ang Libertad Market kag igasunod ang Burgos Market bangud nalimpyuhan na sang City Engineer’s Office ang drainage sa Central Market.
Bwas nga adlaw, magaupod ang CDRRMO team kag ang nagikan sa Bacolod City District Engineering Office sang DPWH bangud sila ang magabukas sang manhole sa mayor nga dalanon sa ciudad.
Aminado si Vargas nga indi madali-dali ang declogging bangud magadepende ini sa kadamuon sang basura nga haw-ason ukon ang mga nagasupon sa kanal.
Magauntat naman ang operasyon kun mag-ulan.
Ang disinfection naman sang mga merkado ang ginapatigayon sang lain nga team sa idalom sang CDRRMO kada weekend.
Suno sa executive assistant sang alkalde, indi na kinahanglan ang disinfection pagkatapos sang declogging bangud wala man nagalapta ang higko sa dalan, sa baylo, diretso ini sa dako nga tangke sang declogging truck.
