Ginpakigbato sang depensa ni Vice President Sara Duterte nga may rason ang iya nangin pahayag sadtong 2024 tuhoy sa ginaalegar assassination threat kay Pres. Ferdinand Marcos Jr., First Lady Liza Araneta-Marcos, kag anay House Speaker Martin Romualdez.
Ginpahayag ni Atty. Mark Vinluan, depensa ni VP Sara, nga ang pahayag sini ang sabat sa ginatawag nga “Operation Romanov,” nga ginaalegar plano para ipapatay ang bise presidente kag ang bug-os sini nga pamilya.
Gani, nakasambit ang bise presidente sang amo sadto nga mga tinaga.
Suno diri, nagsabat lamang ang bise presidente agud maproteksyunan ang iya pamilya batok sa mga pagpamahog nga nabaton.
Ginaalegar nangin target si VP Sara sa indi otorisado nga intelligence kag surveillance operations.
Suno diri, lakip sa plano ang pag-profile sa mga balay ni Duterte sa Davao kag sa Maynila, pagkakas sa pila ka mga security personnel, kag pag-expose sang iya opisyal nga aktibidad sa Naga.
Samtang, ginpahayag naman sang National Bureau of Investigation nga gintestingan man nila nga imbestigaran ang ginaalegar ”Operation Romanov.”
Suno kay NBI Senior Agent Mark Calilung, gin-imbitahan nila si Duterte kag si “Princess Maui” agud mag maghatag sang detalye natuhoy sa ginasiling pamahog apang wala man nagpakita ang duha.
Nagpanindugan ang NBI nga handa sila nga usisaon ang anuman nga reported nga pamahog sa kabuhi sang bise presidente apang kinahanglan sang kooperasyon sang imbolbado.
