Ginpahayag sang Philippine Institute of Volcanology and Seismology (PHIVOLCS) nga may degassing activity nga nagakatabo sa Bulkan Kanlaon.
Sa interview sang Bombo Radyo Bacolod kay Mari-Andylene Quintia, resident volcanologist sang Phivolcs Kanlaon Volcano observatory, ang degassing sa bulkan ang pagsungaw sang puti nga manipis nga aso nga may dala nga baho sang asupre.
Suno diri, ini ang lain sa ash emission kag sulfur dioxide emission.
Nagpasalig naman ini nga normal activity lamang sang bulkan ang degassing kag humalin sang Pebrero 6 sang natabo ang minor explosive eruption, wala pa sang may nareport nga ash emission.
Ginpakamaayo naman nga may nagakatabo nga degassing nga kun may yara sang pressure sa sulod sang bulkan ini ang mangita kun diin ini makasungaw.
Samtang, pahayag ni Quintia indi pa mahambal kun ano ang exact nga status sang magma sa bulkan bangod ini ang nagakainahanglan sang malawig nga pagtuon.
Sa pihak nga bahin, nagdangat na sa 267 ang natukod nga tent sa tent city sa brgy 3, ciudad sang Himamaylan.
May yara man sang ginbutang nga water tanks sa area para sa mga evacuees.// Sa karun nagapabilin nga yara sa alert level 3 ang status sang bulkan.
