Target sang ginapatigayon nga labing-una nga Negros Occidental Coffee Fiesta nga mapabugal nga may-ara sang dekalidad nga kape sa probinsya.
Sa interview sang Bombo Radyo Bacolod kay Teddy Cañete, Presidente sang Negros Coffee Council, ang province-wide nga aktibidad ang ginapatigayon sa Ayala Malls Capitol Central sumugod sang Agosto 9 kag subong nga adlaw, Agosto 11 ang katapusan.
Sila ang nag-imbetar man sang mga bisita gikan sa iban nga probinsya, agid nga mapakita nga may mataas nga kalidad sang kape sa probinsya.
Suno diri, sa karun nakita nga nagataas ang demand sang kape sa probinsya, apang bangod sa manubo nga numero sang existing coffee farm, sila ang makasupply lamang sang 15 porsyento sang coffee consumption sang mga Bacolodnon kag Negrense./Bangod sini, ang probinsya ang naga-import pa sang 85 tubtob 90 porsyento nga kape gikan sa iban nga lugar.
Sa programa, ginatinguhaan man nila nga makahuman sang network sa tunga sang mga coffee planters, mga coffee shops kag barista.
Aminado si Cañete nga sadto, madamo sang coffee farms sa probinsya apang sang late 80s kag early 90s, kalabanan sa mga farmers ang nagsaylo sa iban nga crops bangod wala nagakahatagan atensyon ang nasambitan nga produkto.
Sa mga existing coffee planters naman, kalabanan sa mga ini ang ginapabay-an lamang kag ginabalikan lang sa tion sang harvest season.
Suno diri, kun ang pagtanom ang natural nga pamaagi kaangay sa ila nga nagatanom sa tiilan sang Bulkan Kanlaon, sila ang makaproduce sang halos tunga sa kilo sa kada puno.
Apang kun ang coffee farm ang nagagamit gid sang abono, ang mga ini ang makaproduce sang tubtob duha ka kilo nga kape sa kada puno.
Ginapadayaw ni Cañete nga halos tanan nga breed sang kape ang may-ara sa Negros Occidental, kag sa kada breed may-ara pa ini sang nanarisari nga varieties.
Suno diri, kada tuig may national competition kun sa diin ginatest ang kalidad sang coffee bean, kag sa masami sulod sa Top 10 ang Negros Occidental.
