Nakahanda na ang billeting area para sa delegado sang Western Visayas nga magahampang sa Palarong Pambansa nga patigayunon sa Cebu.
Ang Opening sang pahampang ang patigayunon sa Hulyo 9 kag ini ang magatakop sa Hulyo 16.
Sa interview sang Bombo Radyo Bacolod kay Hernani Escullar, public information officer sang Department of Education-Western Visayas, nag-una na ini sa pagpadulong sa Cebu City agud nga makita ang billeting area sang delegado sang Region 6.
Suno kay Escullar, nakahanda na ang Guadalupe Elementary School sa pag-accommodate sang delagado.
Natalana bwas, Sabado, magapadulong sa Cebu ang gikan sa Panay kag Guimaras samtang sa Domingo magabiyahe ang nagikan sa probinsya sang Negros Occidental.
Ginsiguro man nila nga wala na sang problemahon ang mga atleta sa pag-abot sa lugar kag nakahanda naman ang Mess Committee kun nagutom ang mga ini kag kun luyag nga magexercise, malapad man ang eskwelahan.
Suno kay Escullar, indi man malayo sa Cebu Sports Complex ang billeting area sang Region 6.
Ang Western Visayas ang may sang kabug-usan nga 933 ka deligado nga ginalakipan sang 601 ka mga atleta kun 214 ang Elementary, 346 sa secondary kag 41 sa para games.
Samtang ang coaches, assistant coaches and chaperones ang yara sa 136 kun sa diin 50 sa Elementary, 73 secondary kag 13 sa Para Games at 96 nga miyembro sang management committee.
Tinguhaon man sang delegado nga makuha ang Rank 1 sa Palarong Pambansa.
