Papuli na ang delegasyon sang Negros Occidental matapos ang paghampang sa Batang Pinoy 2023 kag Philippine National Games sa Pasig City.
Sa interview sang Bombo Radyo Bacolod kay Anthony Carlo Agustin, Executive Assistance for Sports sa Negros Occidental Provincial Government, sa record sang Provincial Sports Office, kabug-usan nga 94 ka mga atleta, 14 ka coaches kag 11 ka support staff ang nakigbahin para sa Batang Pinoy 2023 samtang sa 33 naman ka atleta kag siyam ka coaches ang sa Philippine National Games.
Nakigbahin ang mga ini sa mga sporting events nga archery, badminton, boxing, chess, futsal, karatedo, sepak takraw kag table tennis.
Sa unofficial result nga nabatun sini gikan sa mga coaches kag support staff, walo tanan ang medalya nga nakuha ang Negros Occidental delegations nga ginlakipan sang isa ka gold sa karatedo, isa ka gold sa futsal girls under 17, silver medal sa futsal boys under 15 kag bronze sa chess para sa Batang Pinoy 2023 samtang nakakuha man ang mga atleta sang duha ka gold medal sa chess kag isa ka silver kag bronze sa karatedo para sa Philippine National Games.
Nanarisari naman ang venues sa kada sporting events gani pila lamang ka hampang ang personal nga nalantaw ni Agutsin ilabi na nga tuman ang traffic.
Aminado ini nga gintinguhaan man sang Philippine Sports Commission (PSC) nga ma-accomodate ang panginahanglanon sang mga atleta, gani panawagan sini nga likawan na lamang nga mangin tuman ka kritikal sa mga kapaltahan.
Apang sa personal sini nga assessment, mas maayo kuntani kun indi tuman ka layo ang mga hampang kag indi tuman ka traffic ang venue kaangay sang nangin hampang sa Puerto Prinsesa City, Palawan sang 2022.
Suno diri, kadam-an sa mga sporting events ang mahapos makadtuan sadto bangod wala sang traffic.
Nagalaom ini nga madiskusyunan ang kaangay nga mga problema sa meeting sang PSC sa pagpatigayon sang masunod nga Batang Pinoy 2023 kag Philippine National Games.
Suno kay Agustin, bwas makaabot na as probinsya ang delegasyon.
Ginpasalamatan man sini ang mga nagsuporta gikan sa Negros Occidental Provincial Government, mga alkalde sang tagsa ka atleta kasubong man ang mga support staff kag ginikanan nga nagpakita sang suporta kag ang mga coaches nga amo ang personal nga nagsuporta sa mga kinahanglan sang mga kabataan samtang yara sa pahampang.
