Dako ang pagpati ni Negros Occidental Sports Coordinator Romeo Sison nga preprarado kag dedikado ang mga atleta sang probinsya para sa 2025 Western Visayas Regional Athletic Association (WVRAA) nga ginapatigayon sa probinsya sang Antique.
Sa interview sang Bombo Radyo Bacolod kay Sison, may schedule na para sa tanan nga hinampang apang suspendido ang outdoor games alas- 10:00 sang aga tubtob alas- 3:00 sang udto bangod sa tuman ka init.
Suno diri, may yara sang 16 ka sports discipline sa elementary level, 22 sa secondary level kag may yara pa sang paragames.
Sa kabug-usan, may 542 ka athletes ang probinsya sang Negros Occidental, may 100 ka coaches kag assistant coaches, 50 ka trainors kag 39 ka chaperones.
Suno kay Sison, kampante ini sa performance sang athletes bangod sa tanan nga preparasyon, dedikasyon kag commitment sang players, DEPED officials, LGUs, kag probinsya.
Wala naman sang dako nga problema sa billeting area bangod tupaday ang mga eskwelahan nga ginatiniran sang tanan nga delegates.
Apang, may yara lang sang kakulangan sang tubig apang yara ang Bureau of Fire Protection (BFP) kada adlaw para maghatag sang dugang nga water supply.
Ginalauman naman sini sa karun nga matuman ang mensahe ni Negros Occidental Governor Eugenio Jose ‘Bong’ Lacson nga antes magsaylo sa Negros Island Region ang probinsya sa masunod na tuig, makabilin anay ang Negros Occidental sang history bilang nagapanguna nga probinsya sa 2025 Western Visayas Regional Athletic Association.
