Ginkumpirmar sang pinuno sang Finance and Appropriations sa Bacolod nga natapos na ang deliberasyon sang kapin 50 ka mga departamento para sa 2021 annual budget sang ciudad kag natalana nga ipasulod sa second reading sa session sang Sangguniang Panlungsod sa Miyerkules.
Sa interview sang Bombo Radyo kay Councilor Cindy Rojas, ginpahayag sini nga natapos na ang deliberasyon sang masobra 50 ka mga departmento sa sulod kag sagwa sang Bacolod Government Center kag iya ini ipasulod sa second reading sa Miyerkules agud madiskusyunan.
Suno kay Rojas, kun ini ang mapasar sa SP, iya naman ini ipasulod sa third and final reading sa masunod nga semana.
Aminado ang konsehal nga may yara sang pagnubo sa balor sang 2021 proposed budget sang ciudad kun sa diin nagikan sa P3 billion sini nga tuig, yara na lang ini sa P2.6 billion.
Suno sa iya, kalabanan sa mga departamento ang nabuhinan ang budget apang nagsaka naman ang budget sang City Health Office bangud dako ang papel sini sa COVID-19 response sa ciudad.
Suno diri, wala naman sang pagbag-o sa budget sang Disaster Risk Reduction and Management Office (DRRMO), Department of Education kag Bacolod Traffic Authority Office (BTAO) nga imbolbado man sa pagpakigbato sa pandemic.
Suno kay Rojas, may yara man sang ginreserba nga budget para sa COVID vaccine in kaso nga mangin available na ini sa masunod nga tuig.
