Ginpahayag sang food delivery rider nga magamay nalang gid ang ila nga kita kadungan sang pagsaka sang presyo sang produktong petrolyo.
Suno Kay Edjohn, ang pagsaka sang presyo sang gasolina ang isa sa rason nga magamay nalang gid ang ila nga mapauli nga kita.
Suno diri, indi lamang nila mabatyagan ang mahal nga presyo sang gatong kun madamo ang nagapadeliver.
Bukas man sila kun mangin legal ang pagpa-angkas sang mga customer para sa dugang nga income.
Wala man sila sang mahimo bisan mahal ang presyo sang gatong kundi magpadayon, bangud mas maayo nalang nga nagatrabaho apisar nga gamay ang income sangsa wala nagid sang palangabuhian.
Samtang trip-tughong nalang ang himuon sang tricycle driver sa Talisay City bangud sa kamahal sang presyo sang gatong.
Sa interview sang Bombo Radyo Bacolod kay Benjie, Ang tatlo sini ka trip sa pagbiyahe padulong sa Dos Hermanas ang mangin duha nalang bangud sa kamahal sa presyo sang gatong.
Ginalantaw man sini ang posibilidad nga magauntat na lamang kun ang kota sa pagbiyahe ang pierde sa presyo sang gasolina.
Suno diri, kun magdul-ong sang pasahero na lamang siya magapatughong, bangod indi naman sini masarangan nga ifulltank ang iya nga trycicle.
