Isa ka ordinaryo nga delivery rider ang nangin baganihan matapos ginluwas ang isa ka bata sa pagkahulog halin sa bintana sang ila balay sa Tondo, Maynila.
Nahulog ang bata gikan sa bintana sang ila balay apang antes pa ini maghugpa sa semento, nasalo ini sang isa ka delivery rider nga na-tiempohan nga yara sa idalom sang balay.
Sa video nga kuha ni Mike Francisco, makit-an ang rider nga si Bryan Serrano samtang nagadul-ong sang parcel sang Hulyo 22, sa Barangay 375, Zone 38 sa Tondo.
Samtang ginahulat ang magabaton sang delivery, natalupangdan ni Serrano nga may bata nga yara sa bintana sa ikaduha nga panalgan sang balay.
Suno diri, naglaum ini nga may upod nga nagabantay sa bata apang makaligad ang pila ka segundo, nakita niya nga nagdire-diretso ang bata paggwa sa bintana.
Wala na ini nagpangduha-duha pa kag gilayon nagpwesto agud sal-on ini kag madinalag-on nga nasalo ang bata.
Wala man ginalauman ni Serrano nga mahimo ya ang pagsalo bangud may yara pa ini sang ginabatyag nga sakit sa iya abaga tuga sang aksidente sa motorsiklo.
Pagkabwas, ginbisita sini ang pamilya agud hibaluon ang kahimtangan sang bata.
Suno sa mga ginikanan, nakaangkon lamang ini sang mga gasgas apang luwas sa anuman nga katalagman.
Sa ulihi, ginpamatud-an ni Serrano nga “not all hero wear capes.”
