Sa bulan sang Marso, natalana nga i-anunsyar sang AstraZeneca ang delivery schedule sang COVID-19 vaccine sa Pilipinas.
Suno kay Negros Occidental Governor Eugenio Jose “Bong” Lacson, wala nila gindayon ang gintalana kuntani nga zoom meeting sang nakaligad may kaangtanan sa COVID-19 vaccine bangod isa palang sadto ang agenda nga amo ang pagpamangkot sa mga local government units (LGUs) sa probinsya kun sin-o pa ang magabakal sang bakuna.
Sa karun ginahulat pa sang gobernador ang roll out plan nga pagapangunahan ni Provincial Health Officer Dr. Ernell Tumimbang kag ini naman ang igapadangat sa mga alkalde kasubong man sa mga City kag Municipal Health Officers.
Sa pinaka-ulihi nga meeting sini sa AstraZeneca, nagpahayag ang kompanya nga iga-anunsyar nila ang delivery schedule sa Marso para sa mga gin-order nga bakuna.
Ginalantaw naman ni Lacson nga makahatag ini sang kahigayunan sa mga LGU agud nga makapreparar antes ang pag-abot sang bakuna.
Ginpakigbahin man ni Lacson nga gin-athag na ni Vaccine Czar Secretary Carlito Galvez Jr nga umpisa pa lang, tinutuyo na sang National Government nga bakunahan ang kabug-usan nga 70 porsyento sang populasyon.
Apang pahayag man ni Galvez nga indi naman ang mga ini makapamalibad kun luyag nga magbakal sang mga LGU.
Suno sa gobernador, nagpasalig ang National Government nga sila ang bahala sa pagbakuna, apang wala naman sang ikasarang nga magpili ang mga magabatun sang bakuna.
Apang nagpasalig naman ang mga ini nga tanan nga bakuna nga pagapahanugutan sang Pilipinas ang segurado nga safe.
