BACOLOD CITY — Nagpanugyan ang opisyal sang Department of Education sa mga adviser sang mga estudyante nga himuon nga transparent ang pagpreparar sang honor roll subong nga nagahilapit ang pagsira sang klase para sa school year 2017-2018.
Sa interview sang Bombo Radyo kay Schools Division Superintendent Cynthia Demavivas sang DepEd Division of Bacolod City, dapat nga likawan sang mga manunudlo nga magpabor sa isa ka estudyante pinaagi sa pagpreparar sang husto nga rekord sang grades.
Ini agud nga mangin handa pananglitan may mga ginikanan nga magkwestyon sa ranking sang ila kabataan sa honor roll.
Sa pihak sini, nagpanugyan si Demavivas nga ang honor nga makuha sang estudyante ang indi talaksan sang iya kadalag-an bangud may yara man sang ulihi nalang nagatutom kag mas successful pa sangsa yara sa honor roll.
Nagpanawagan man ini sa mga ginikanan nga indi paghambalan ang mga kabataan nga indi mag-attend sa graduation bangud may nasawayan sa grades.
