Nakatipon na sang 540 million dollars si Democrat nominee Kamala Harris masobra isa ka bulan humalin sang nagsugod ang iya kandidatura agud mangin Presidente sang Estados Unidos matapos nga nagbaha ang mga donasyon sa Democratic National Convention sang tinalikdan nga semana.
Sa isa ka memo nga ginrelease sang campaign manager ni Harris, ginpahayag ni Jen O’Malley Dillon nga ang natipon nga 540 million dollars ang ginalakipan sang 82 million dollars sa convention week ang isa ka senyales sang Democratic enthusiasm para sa iya kandidatura.
Suno diri, ini na ang pinakamadamo nga natipon sa maskin ano nga presidential campaign sa karun.
Si Vice President Kamala Harris ang nangin kandidato sa pagka-Presidente sang Hulyo 21 matapos nga nagpaiway si President Joe Biden bangud sa pressure nagikan sa mga kaangay sini nga Democrats nga nagakahangawa sa iya cognitive ability matapos ang indi maayo nga performance sini sa debate batok kay Republican Donald Trump sang Hunyo 27.
