Gindeklarar na nga presidente sang Estados Unidos ang Democratic candidate nga si Joe Biden, suno sa report sang pila ka mga dalagko nga network sa Amerika.
Santo sa projection sang CNN, NBC News kag CBS News, subong man sang Associated Press, madinalag-on nga nakuha ni Biden ang boto sang pila ka mga “key battleground” states nga nadag-an sang 2016 ni President Donald Trump.
Sa vote count, nakakuha sang 273 electoral votes si Biden samtang 214 naman kay Trump.
Kun pagabasehan naman ang results count sang AP, nakakuha sang 284 electoral votes si Biden samtang 214 si Trump lakip diri ang Arizona.
Kadungan sang kadalag-an ni Biden, ginalauman man ang pagpungko bilang bise-presidente ni Kamala Harris, nga mangin labing una nga babaye kag black vice president.
Antes nangin presidente, walo ka tuig nga nagserbi bilang vice president si Biden sa idalum sang administrasyon ni anay President Barack Obama.
Gilayon nga nagpasalamat si Biden sa mga nagboto sa iya paagi sa iya Twitter account.
Suno sa President-Elect, honored ini nga siya ang ginpili sang America nga magpamuno sa dako nga pungsod.
Aminado man ini nga mabudlay ang ubra nga iya pagaatubangon apang nagapromisa ini nga siya ang mangin Presidente sang tanan nga Amerikano, ginboto man siya ukon wala.
Nagpasalig man ini nga indi niya pag-uyangan ang pagsalig nga ginhatag sang mga pumuluyo sa iya.
Nagpasalamat man ang bag-o nga bise-presidente kag gilayon nga nagpahayag sang pagkahanda sini sa bag-o nga panugod sang Amerika.
Suno kay Harris, ang ini nga eleksyon ang ini lang nahanungod kay Biden ukon sa iya.
Suno sa iya, ini ang para sa kalag sang Amerika kag sa ila willingness nga ipakigbato ini.
Gindugang man sang Vice President-Elect nga madamo sang ubra nga nagahulat sa ila kag ila na ini suguran.
