Nangin matawhay ang on-going demolition sa 27 ka mga pamalay nga yara sa tunga sang Mambuloc Creek sa Prk Balinday sa Brgy 2, Bacolod City.
Sa interview sang Bombo Radyo Bacolod kay Bacolod City Legal Officer Atty Karol Joseph Chiu, wala sang resistance gikan sa mga pumuluyo bangod nakaligad nga tuig pa lamang napa-athag na sa mga ini nga ang lugar ang danger zone.
Ginkadtuan mismo sang Bombo News Team ang area, kun sa diin halos indi makita kun yara sa highway bangod kongkreto ang mga balay nga yara sa kilid sang dalan.
Apang may-ara sang gamay nga alagyan pasulod kun sa diin mga kawayan na lamang ang lalatayan.
Ang mga balay ang may-ara lamang sang kawayan nga pundasyon agud mangin mas mataas sangsa water level sang suba, apang kalabanan ang human sa light materials.
Ang demolition ang kabahin pa sa Oplan Kontra Baha project, nga gin-umpisahan paagi sa dredging activities sa Mambuloc Creek.
27 ka mga balay ang kinahanglan nga idemolish, apang 37 ka pamilya ang apektado.
Boluntaryo naman nga nagpangbaklas ang pila ka mga pumuluyo agud mahimos pa nila ang mga pagkabutang nga sarang pa nila magamit sa pagtukod sang bag-o nga balay sa rellocation site.
May 30 ka mga personnel naman nga ginpadala ang City Legal Office para sa demolition activity.
Ang mga apektado ang hatagan sang relocation sa Prk Arao, Brgy Vista Alegre, apang 20 lamang ka pamilya ang naqualify sang Bacolod Housing Authority para sa relocation.
Requirement diri nga dapat masobra lima ka tuig na nga nagapuyo sa lugar, samtang disqualified man ang mga nahatagan na sadto sang rellocation apang wala gin-istaran.
Samtang luwas sa P10,000 nga cash assistance gikan sa Department of Social Services and Development, si Bacolod City Mayor Greg Gasataya ang nagpasalig naman nga magahatag sang sin ukon atop sa mga apektado.
