Target sang Bacolod City government nga mademolish ang mga balay nga yara sa pangpang sang Mambulok Creek sa Hulyo 15 ukon antes ang nasambit nga petsa.
Suno kay Rey Demisana, pinuno sang City Legal Enforcement Team, natapos na ang tagging kun sa diin gintumod ang mga structures nga unahon sa demolition kag kun diin paagyon ang mga materyales.
Ang apektado nga mga balay ang ginalakipan sang walo sa Barangay 8 kag 32 sa Barangay 2 ukon kabug-usan nga 40.
Kalabanan naman nga pamilya ang naawardan na sang Bacolod Housing Authority sang sayluhan kag ginahulat sang mga ini ang financial assistance nagikan sa city government.
Suno kay Demisana, maaddress naman ang financial assistance bangud ginahandaan na ini sang City Hall.
May yara naman sang pre-demolition conference nga hiwaton sa barangay sa presensya sang Presidential Commission for the Urban Poor.
Target sang ciudad nga mapatigayon ang demolition sa Hulyo 15 gani ginahulat sa karon ang schedule sang Presidential Commission for the Urban Poor para sa pre-demolition conference agud nga maplantsa ang iban nga issues kaangay sang pagrelease financial assistance kag exact schedule sang demolition.
Nakabaton naman sang impormasyon si Demisana nga may mga pamilya na nga nakabaton sang ayuda agud nga magamit sa ila nga pagsaylo.
Suno diri, may standard ang BHA sa pagtumod sang relocatees gani diri ibase ang maqualify ukon madisqualify.
Kun mag-abot na ang date of demolition suno kay Demisana, igademolish na ang tanan nga structures.
Suno kay Alexander Semblante sang Barangay 2, igademolish ang ila balay sa Hulyo 15.
Naawardan naman ang mga ini sang balay sa Abada Escay Relocation Site sa Barangay Vista Alegre nga may 64 square meters nga lot area gani nakapatindog na sila sang balay didto.
Suno diri, sila na mismo ang nag-amat-amat guba sang ila balay sa pangpang sang suba bangud mapuslan pa ang mga kahoy nga sarang masalvage.
Sanday Semblante ang 10 na ka tuig nga nagapuyo sa pangpang sang creek.
Pagbyahe sang e-bike sang iya nga pangabuhian.
