Nagdangat sa 1,987 ang kaso sang dengue sa ciudad sang Bacolod kag nagdangat na sa lima ang nagkalamatay bangud sa nasambit nga balatian.
Nagapanguna sa may pinakamadamo nga kaso sang dengue ang Barangay Taculing nga may 234, ginasunod sang Barangay Bata nga may 166; Barangay Estefania nga may 154; Mansilingan nga may 152; Barangay Villamonte nga may 130, Mandalagan nga may 103; Barangay Tangub nga 99; Alijis nga may 97; Sum-ag 87; Sincang 81; Barangay Cabug nga may 77; Barangay Banago 77; kag Granada 76.
Samtang ang lima ka mga nagtaliwan bangud sa Dengue ang tag-isa sa Barangay Estefania; Barangay 16; Barangay Felisa; Barangay Sum-ag kag Barangay Villamonte.
Ang kaso ang nagsaka sang 312.2 percent kumparar sa pareho nga period sang tinalikdan nga tuig.
Sa interview sang Bombo Radyo Bacolod kay Councilor Claudio Jesus “Kalaw” Puentevella, Chairperson, Committee on Health sang Sangguniang Panlungsod, agresibo sagihapon ang ginapatigayon nga fogging kag ginaengganyo ang tanan nga ibalik ang 3’oclock habit kasubong man ang pagpractice sang 4S nga ginalakipan sang “Search and Destroy” ang ginapangitlugan sang lamok nga nagadala sang dengue; “Secure Self Protection gikan sa kagat sang lamok; “Seek Early Consultation” kun may yara sang sintomas sang dengue kag; “Say Yes to Fogging” bilang last resort.
Nagpanugyan man si Puentevella nga kun mahimo limitahan ang mga kabataan sa paghampang sa gwa sang balay.
