Malapit na 20 ang numero sang mga nagkalamatay bangud sa dengue sa ciudad sang Bacolod kag probinsya sang Negros Occidental humalin sa panugod sang subong nga tuig.
Sa interview sang Bombo Radyo Bacolod kay Dr. Elvie Villalobos, pinuno sang infectious diseases cluster sang Department of Health Region 6, nagdangat na sa 18 ang patay sa Bacolod kag Negros Occidental bangud sa dengue humalin sang Enero 1 tubtub Mayo 25 subong nga 2019.
Ini ang ginalakipan sang isa ka patay sa Bacolod kag 17 sa Negros Occidental.
Nagnubo ang patay sa Bacolod nagikan sa tatlo sa pareho nga period sang tuig 2018, apang nagsaka naman sang lima ang patay sa Negros Occidental.
Sang Enero 1 tubtub Mayo 25 tuig 2018, naglab-ot lang ang 13 ang patay sa probinsya.
Santo sa datos sang DOH Region 6, nagdangat sa 430 ang dengue cases sa Bacolod sa nasambit nga period.
Ini ang mas mataas sang 70 porsyento sa 253 cases nga narekord sa kaangay nga period sang tuig 2018.
Samtang sa Negros Occidental naman, nagsaka man sang 70 porsyento ang dengue cases subong nga tuig.
Suno kay Villalobos, naglab-ot sa 2, 174 ang kaso nga narekord subong nga 2019 nagikan sa 1, 270 dengue cases sang 2018.
Sa pihak sini, indi pa madeklarar suno kay Villalobos ang dengue outbreak sa probinsya.
