Ginalantaw sang Provincial Environment and Natural Resources Office Negros Occidental nga panahon na agud ipangabuhi ang indi paggamit sang single-use plastic.
Tinalikdan nga inadlaw, gin-aprubahan na sang Kamara sa second reading ang hagna nga magadumili sang paggamit sang single-use plastic.
Suno kay Negros Occidental 3rd District Rep. Francisco ‘Kiko’ Benitez, ang House Bill 9147 ang magaregulate sang produksyon, importasyon, pagbaligya kag paggamit sang single-use plastic agud nga mapunggan ang malain nga epekto sini sa palibot.
Ginconsolidate sang technical working group nga ginapamunuan ni Benitez ang 42 ka mga hagna kag resolusyon agud nga mahimo ang House Bill 9147.
Sa interview sang Bombo Radyo kay PENRO Negros Occidental head Edgardo Rostata, madamo na sang hagna nga pending sadto sa Kamara apang wala nakalampuwas.
Mahimo suno kay Rostata nga ini na ang panahon nga ipangabuhi ang indi paggamit sang single-use plastic bangud ang paggamit sini ang may dako nga halit sa palibot.
Kun matigayon nga mapasar ang layi suno sa PENRO head, mahimo nga binulan ukon tinuig man lang ang adjustment antes maanad ang mga Pilipino.
Indi malipod suno kay Rostata nga maalarma sini ang mga negosyante sang plastic apang mahimo nga may paagi man ang gobyerno agud nga sila ang mabuligan.
Aminado naman ini nga may mga local government units na nga nakapasar sang ordinansa nga nagaregulate sang single-use plastic kaangay sang San Carlos City.
