Gin-athag sang public information officer sang Department of Education-Division of Negros Occidental nga wala ginadumilian ang mga manunudlo nga maggamit sang social media.
Apang sa administrasyon ni Vice President kag DepEd Secretary Sara Duterte ang nagpagwa lamang sang pahanumdom nga mangin responsable sa paggamit sini.
Sa interview sang Bombo Radyo Bacolod kay Ian Arnold Arnaez, wala man ginadumilian apang dapat mangin responsable ang mga manunudlo sa paggamit sang social media.
Suno kay Arnaez, kun tuman na ang exposure sang mga manunudlo sa social media, mahimo nga madamo na ang mga ini sang maengkwentro nga mahitabo ukon sitwasyon nga makabutang sa ila kaugalingon sa alang-alang.
Suno diri bisan wala ginadumilian nga maggamit sang social media, dapat paminsaron sang mga manunudlo nga sa gwa man ukon sa sulod sang eskwelahan dapat ang paginawi ang nagakadapat man bilang isa ka manunudlo.
Suno pa diri, dapat ang mga manunudlo ang makahibalo kun san-o dapat kag indi dapat nga mag-expose sang kaugalingon sa social media.
Normal man ang magpangakig apang dapat panumdumon nga ang manunudlo ang dapat magsunod sa Child Protection Policy kag panumdumon nga indi dapat magresulta sa mental health abuse ang klase sang pagpangakig.
Ini ang kasunod sang pagviral sang isa ka manunudlo nga nagapinangakig samtang nakalive sa social media.
Suno kay Arnaez, ang mga manunudlo ang ginatudluan man sang positive disciplining.
Ginpahayag man sini nga ang komunikasyon ang yabi agud nga mapasanag ang paminsaron sang mga kabataan.
Panugyan pa sini nga dapat ipabilin gid sang mga manunudlo ang professional image.
