Ginpahayag sang Department of Education (DepEd) nga ang pagbuhin sang timeline sa pagrevert sang school calendar sa daan nga schedule ang makaangkon sang dako nga impact sa kondisyon sang mga estudyante kag mga manunudlo.
Ini ang ginpahayag sang DepEd matapos ang pronouncement ni President Ferdinand Marcos Jr. nga nagapangita sa karun sang pamaagi ang gobyerno agud mabalik ang daan nga school calendar sa madasig nga tion
Sa interview sang Bombo Radyo kay Grace Abellar, representative sang Alliance of Concerned Teachers-Negros, nagakumporme ini nga sa 2026 pa matigayon ang pagbalik sang old school calendar agud indi man makompromiso ang bakasyon kag pahuway sang mga manunudlo.
Suno kay Abellar, summer na lamang ang gina-avail nga pahuway sang mga manunudlo bangud wala sila sang iban nga leave kaangay sang mga empleyado sang gobyerno kag kun indi ang padalion kag buhinan pa, maapektuhan ang mental health, break kag preparasyon sang mga ini para sa masunod nga school year.
Suno diri, wala sila nagapamatok sa amat-amat nga pagpabalik sang old school calendar apang basta masiguro nga matigayun na gid ini sa 2026 bangud madamo na sang mga promisa nga wala nagakatuman kaangay na lamang sang pagpasaka sang ila sweldo.
Aminado man ini nga mabudlay ang sitwasyon sa karun sang pagtuon sang mga estudyante bangud sa two year nga gap kun sa diin apisar nga madamo pa ang wala nakahibalo magbasa, ginpapasar na lang sadto bangud mga ginikanan man ang nagasabat sa mga modules.
Suno kay Abellar, magluwas sa pagpabalik sa old school calendar, dapat tutukan man sang gobyerno ang mga classrooms nga indi conducive kag ang ventilation kag indi lamang band aid solusyon.
Suno diri, mabudlay ang sitwasyon sa karun sang pagtuon kag ginalantaw sini nga sa tig-ululan, makaangkon man sang kaangay nga problema bangud sa sitwasyon sang mga classrooms sa pungsod gani nagapanawagan ini sang long term solution.
