Bangud nga nauso sa karun ang paghatag sang garlands kag boquets nga may kwarta para sa mga estudyante nga nagradwar sa ila pag-eskwela, naghatag sang pahanumdum ang isa ka opisyal sang Department of Education sa mga ginikanan nga nagahimo sini nga mangin sensitibo man sa balatyagon sang iban.
Suno kay DepEd-7 Director Salustiano Jimenez, desisyon sang mga ginikanan kun luyag nila nga regaluhan sang kwarta ang ila mga kabataan bilang reward sa pagpaninguha sang ila mga kabataan nga makatapos.
Apang, nagpahanumdum ini nga ang pagpakita sini sa atubang sang publiko ang posible nga makahatag sang iban nga meaning sa iban nga tawo kag posible man nga makasakit sa balatyagon sang mga persona nga nagapangatubang sang krisis pinansyal.
Nagpahandumdum man ini sa publiko natuhoy sa mga layi kun sa diin pwede mamultahan ukon magpangatubang sang penalidad ang indi insakto nga paggamit sang kwarta ukon pagguba sini.
Sang tinalikdan nga tuig, isa ka Grade 10 ang ginregaluhan sang iya manong sang P1 million nga ginhimo nga kapa.
