Suportado sang Department of Education Regional Office 6 ang pagbakuna sa mga kabataan nga naga-edad sang 5 tubtob 11 anyos batok sa COVID-19.
Sa interview sang Bombo Radyo Bacolod kay Hernani Escullar Jr., tagpamaba sang DepEd Regional Office 6, ginpahayag sini nga ang pagbakuna sa nasambit nga age group ang santo man sa rekomendasyon sang Department of Health (DOH).
Suno kay Escullar, magasunod ang Deped sa guidelines nga ipatuman sang DOH para sa kaayuhan sang tanan.
Suno diri kun legible lang man ang bata nga kabahin sa nasambit nga age group kag may consent sang ginikanan kaupod sa pagsunod sa guidelines sang DOH, magapadayon sila sa pag-engganyo nga magpabakuna batok sang COVID-19.
Apang paathag sini nga indi mandatory ang pagpabakuna.
Gina-engganyo man nila ang mga ginikanan nga magpabakuna agud mangin ehemplo sa ila mga kabataan nga magpabakuna man batok sa virus.
Nahibaluan nga subong nga adlaw, gin-umpisahan na ang pagbakuna sa mga kabataan nga nagaedad sang 5 tubtob 11 anyos batok sa COVID-19.
